A wonn i no so gschlampat bin,
hat Ordnung durchaus aa an Sinn.

Grod schau i wieda hin und her
und frag mi, ob´s net gscheida wär,
dass i vielleicht heit no was tua
mit ana Raum- und Zeitstruktua,
damit i net so wia a Henn
nervös im ganzn Haus rumrenn.

Statt hoibheazig dahinzuträumen,
soitt i nua in gschlossnen Räumen
arbeitn ganzheazig bis
die nexte Pausn angsagt is.

Schee ordntlich kann i die Sachn
anfanga und fertigmachn.

Trotzdem mag i, wann i hin
und wieda aa chaotisch bin.
Net oiwei - nua von Zeit zu Zeit,
weil mi die Abwechslung so gfreit.

Und wann mi d`Leit desweng net meng,
wel´s grad a Chaos bei mia seng,
dann taans ma goa nimma so laad,
denn o h n e Chaos waa´s ma z´faad.
Die nexte Ordnung kummt bestimmt,
solang mia neamd mei Chaos nimmt.